炒瘋

08北京奧運揭幕加上香港協辦奧運馬術賽，但最能令港人瘋狂的，不是場內的賽事，而是賽前發售的紀念鈔。從鈔到炒，這個夏天，全民狂熱。砵蘭街好旺角購物中心內，100多間殘舊蚊形舖組成全港最大錢幣郵票炒賣市場，正是風眼所在。炒家都說：「這裏就像股市，秒秒鐘幾十萬上落！」但這個月，全民只炒一隻股——奧運紀念鈔。
「跌咗！又跌咗！跌到180(每張)！你接唔接？你講！我即刻放晒畀你！」「你有幾多？」「200張！」「全部要晒！」奔跑，數錢，收貨……炒風，炒瘋。
燈光昏暗，人聲錯落。商場內，菜隨地放，媽媽在接貨，爸爸等出貨，幾個被丟下的孩子不做功課，圍在地板捉飛行棋。「呢排真係炒到癲。」說話的陸嘉瑋，11歲開始在這商場混，一直至今日。
11歲小六排隊炒郵票，16歲中五賺10萬元開舖，18歲炒執笠，兩星期後東山再起……「經我舖頭的奧運紀念鈔，交易額有500萬元左右。」今年22歲，已歷盡平凡人一生跌蕩，被稱為全港最年輕的郵票錢幣店老闆，同行笑說，他身家以千萬計。「我邊有咁多！」身邊圍一群中年漢，個個都說﹕「我哋都係跟佢搵食。」整個下午，他只負責坐在大夾萬前數銀紙。
坐在舖頭「匯寶閣」指揮，嘉瑋說﹕「我們這行人都好崇拜盧俊雄。」盧炒郵票起家，曾是廣州首富，1995年被《福布斯》(Forbes)列為中國富豪排行榜第13位。但1997年後，盧炒絕版女王頭郵票，加上種種失利，欠債過億，人間蒸發。
廣州神話破滅那年，毛小子陸嘉瑋才11歲。「爸爸帶我來(好旺角)參觀，有好多新奇的錢幣、郵票、古董，好得意，於是開始有興趣集郵。」這商場被內地集郵愛好者稱為國際級藏寶地，中華第一代清朝郵票、南極貨幣、奧運紀念鈔，無奇不有。老商戶大勝哥說﹕「CNN都來過，隨便一個可樂樽都賣萬幾元，第一期電視周刊賣過20幾萬元。」
之後，嘉瑋開始收錢替炒家排隊，「97年排女王頭郵票，50元一本，老闆10倍價錢收，轉手炒過千，那半年大浪，賺了好幾萬，交母親保管」。後來泡沫爆破，「全世界插水，每張只值幾元，才1年半便幾乎變廢紙，好多人唔掂。個市好靜，我少玩了。」01年中五畢業，16歲的嘉瑋賺夠10萬元，問過舊老闆意見，於是開舖。當時經濟低迷，嘉瑋以千多元租下好旺角2樓一間「淡舖」，以寄賣郵票為主。「交到租，每月賺萬一二，當上班囉。」03、04年，中國發行40萬套小版郵票，原價幾元，衝到廣州掃貨，「10幾元一張，6倍價錢賣出，又賺好幾萬，漸漸當股票玩，低買高賣，但真的很難把握賣貨時機」。貪心、誤判，加上市場風浪，一度令他玩完。
「小版初賣20元，眨眼升到100，未幾跌落70，以為升得番，大手掃入，點知由50跌到20，打回原形，蝕7萬幾。加上SARS，什麼也炒不起，索性執笠，點知後來升番……」混了11年，他仍摸不透這場遊戲。
舖頭執了，嘉瑋便跟爸爸到機場學做飛機工程，但兩星期下來，發現還是喜歡郵票，於是轉回本行。「得到一位『高人』支持，搭檔開舖，重新做起。」與記者說期間，他隨手又賣出3套「大套」奧運鈔(一套5款，包括35張相連號碼的20元紙幣)，又要數銀紙，進帳4萬元。
06年又一個大浪，「1980年發行的『金猴』堪稱神話，那是中國首套生肖郵票，每個面值8分，炒到4000幾，一版80個，票面值6.4元，最高炒到40幾萬，即係原價6萬倍！」生意愈做愈大，蝕時，亦輸得大。「見到清朝古典郵票『紅印花』、『大龍郵票』每張由800元升到3000，一版又幾十萬，大手買入，結果每張跌落1200，又輸幾十萬。」
今年是北京奧運年，「總之有中國概念都有得炒，奧運鈔絕對是大浪！」昔日收錢排隊，今日請人排隊，嘉瑋成為報章裏的排隊黨負責人，樣子被打了格仔，令他很不滿﹕「排隊黨負責人又點？點解個樣要打格？」說時，又有客到。
「老闆，呢張「冧巴」(編號399399，稱為「double」的奧運鈔)收幾多？」「400。」「噚日明明話1000！咁海鮮，起碼600啦！」「呢度好多人等開飯。」「2500元3張得唔得？」「嘿，呢度有萬幾張，賣晒畀你好唔好？」糾纏15分鐘後，客仔回頭，「好啦好啦，1500元3張。你班人根本度控制市場！」「真正大莊喺內地，控制市場？你知唔知要幾多億？」
你有幾多身家？「唔係好多，同人夾份買，邊有千萬，今年才交幾萬元稅……」100呎的店裏，放置了過百套奧運紀念鈔，每套15,000元，還有過萬張「單張」，每張值200元，保守估計貨品總值近400萬元。舖內銀紙滿地，堆高如山，還未計櫥窗、夾萬裏的珍貴郵票。商場裏卻不見保安，不怕打劫？他指了指門外那些跟他「搵食」的中年漢，說：「出面班人全部都係保安，邊個敢打劫？」奧運鈔牽起全城炒賣熱，作為本地莊家，有什麼跟散戶說？「你以為『炒』就是買和賣？我玩清朝郵票，看遍書架上20幾本書，本本都是歷史，不然你怎知道價值何來？可以保值多久？只知道搵錢就排隊，眨眼又使晒，有什麼意思？」

離開匯寶閣，再往上走一層，只見一個瘦小男孩在古錢幣店前，敲了敲一枚「咸豐元寶」，叮……傾耳細聽，再用放大鏡盯古幣的字體審視。你看什麼？「聲音清脆代表沒有裂紋，字體可以分辨真假。」
什麼？原來咸豐年比同治年有較多款錢幣？「你回去看看歷史書先啦！咸豐打仗多，狂出錢幣……」咸豐年代，太平天國鯨吞半壁江山，英法聯軍火燒圓明園，清貨幣危機，其子繼位，史稱「同治中興」。男孩掏出300元買下元寶，翻開書包，還有幾百枚不同朝代的硬幣。小子，你叫什麼名字？幾歲？「阿Paul，14歲……」
近日炒風四起，排隊成為年輕人賺取第一桶金的契機，烈日下的人龍，滿眼是嘉瑋年少時的影子：有小學生說要賺幾百元買玩具，賣出紀念鈔的青少年，拿著大疊「大牛」笑說「好過做暑期工。」輕狂年華的嘉瑋卻有老成的忠告：「我奉勸他們(年輕人)賺到錢就好好儲起來，學好有興趣的東西，不然機會來到，也沒錢投資。」
文字:覃純健